આઇસીસી ટ્રોફી સાથે કિંગ ખાન

ઇન્ટરનેશનલ ક્રિકેટ કાઉન્સિલ (આઇસીસી)એ વન-ડે વર્લ્ડ કપનો પ્રોગ્રામ જાહેર કર્યો છે તે સાથે જ ક્રિકેટચાહકોમાં આનંદનું મોજું ફરી વળ્યું છે. આઇસીસી પણ વર્લ્ડ કપ ટૂર્નામેન્ટના પ્રચાર માટે કોઇ કસર છોડવા માગતી ન હોવાથી તાજેતરમાં તેણે બોલીવૂડના બાદશાહ ‘કિંગ ખાન’ શાહરુખની વર્લ્ડ કપ ટ્રોફી સાથેનો ફોટો ટ્વિટર પર શેર કર્યો છે. સાથે સાથે જ વર્લ્ડ કપનો 2 મિનિટ 13 સેકન્ડનો કેમ્પેન વીડિયો સોશિયલ મીડિયામાં રીલિઝ કર્યો છે. આ ટૂર્નામેન્ટ પાંચમી ઓક્ટોબરથી ભારતમાં શરૂ થઈ રહી છે. શાહરુખ ખાનના વોઇસ ઓવર વાળા આ વીડિયોમાં 1975માં આઇસીસી વિશ્વ કપની શરૂઆતથી લઈને અત્યાર સુધીની ઐતિહાસિક અને યાદગાર ક્ષણોને બતાવવામાં આવી છે. વીડિયોમાં દિનેશ કાર્તિક, શુભમન ગિલ, જેમિમા રોડ્રિગ્સ અને દક્ષિણ આફ્રિકાના પૂર્વ ખેલાડી જોન્ટી રોડસ પણ જોવા મળે છે. વીડિયોનો થીમ છે ‘ઓલ ઇટ ટેઇક્સ ઇઝ વન ડે ’એટલે કે કંઈ કરી બતાવવા માટે ફક્ત એક દિવસ. શાહરુખ ખાન આ વખતે વર્લ્ડ કપનો બ્રાન્ડ એમ્બેસેડર છે. આઇસીસીએ વર્લ્ડ કપ ટ્રોફી સાથે શાહરુખ ખાનનો એક ફોટો પણ પોસ્ટ કર્યો છે.