ફિલ્મ ‘આદિપુરુષ’ના ડાયલોગ્સની ચારેબાજુથી ટીકાઓ થતાં ફિલ્મ મેકર્સે તેમાં ફેરફાર કરવાનો નિર્ણય લીધો છે. પ્રભાસ, કૃતિ સેનન અને સૈફ અલી ખાનની ફિલ્મને બોક્સઓફિસને સારું કલેક્શન મળી રહ્યું છે, પરંતુ ફિલ્મના કેટલાક ડાયલોગ્સ સામે સામાન્ય દર્શકોથી માંડીને રાજકીય પક્ષોએ પણ ઉગ્ર વિરોધ નોંધાવ્યો છે. રિલીઝ પૂર્વે વીએફએક્સમાં મોટા પાયે ફેરફાર કરનારા મેકર્સે હવે ડાયલોગ્સમાં સુધારા કરવા તજવીજ હાથ ધરી છે.
ફિલ્મમાં હનુમાનજીનો રોલ કરનારા દેવદત્ત ગજાનન નાગેના આ ડાયલોગથી વિવાદ સર્જાયો છે - ‘કપડા તેરે બાપ કા, આગ તેરે બાપ કી, તેલ તેરે બાપ કા, જલેગી ભી તેરે બાપ કી...’ આ ઉપરાંત અન્ય કેટલાક ડાયલોગ્સ પણ ઓડિયન્સને પસંદ નથી. ફિલ્મથી નારાજ થયેલા લોકોએ દિલ્હી હાઈ કોર્ટમાં કેસ પણ કર્યો છે. દરમિયાન વધતી નારાજગીના પગલે ફિલ્મ મેકર્સે યુટર્ન લીધો છે. અગાઉ ફિલ્મના ડાયલોગ્સને આજના સમય પ્રમાણે લખ્યા હોવાની દલીલ કરનારા મેકર્સે વિવાદાસ્પદ ડાયલોગ્સ બદલવાનો નિર્ણય લીધો છે.
રિલીઝ પૂર્વે વિરોધ ઊઠતાં કેટલાક સીન્સ અને રાવણ-હનુમાનના લૂકમાં પણ ફેરફાર કરાયો હતો. રિલીઝ બાદ ફિલ્મનો ઉગ્ર વિરોધ શરૂ થતાં મેકર્સ હવે બચાવની મુદ્રામાં આવી ગયા છે. જોકે ઓડિયન્સને મોટા પડદા પર રામાયણની મહાકથા જોવાની ઈચ્છા હોવાથી શરૂઆતના બે દિવસ ખૂબ સારા રહ્યા છે. રિલીઝના બે દિવસમાં જ ફિલ્મે વર્લ્ડવાઈડ રૂ. 240 કરોડનું કલેક્શન મળ્યું છે.
કાઠમંડુમાં ભારતીય ફિલ્મો પર પ્રતિબંધ
નેપાળમાં ઘણાં સ્થળે ‘આદિપુરુષ’નો વિરોધ ચાલી રહ્યો છે. તેના પગલે કાઠમંડુમાં સોમવારથી ‘આદિપુરુષ’નું સ્ક્રિનિંગ રોકી દેવા અને તમામ ભારતીય ફિલ્મો પર પ્રતિબંધ મૂકવાનો નિર્ણય લેવાયો છે. કાઠમંડુના મેયર બાલેન શાહે સોશિયલ મીડિયા પર જણાવ્યું હતું કે, સીતા મૈયાના જન્મ સ્થળ અંગે સુધારો થવો જોઈએ. તેમનો જન્મ નેપાળના જનકપુરમાં થયો હતો. બીજી બાજુ ભારતીય માન્યતા મુજબ, તેમનો જન્મ સીતામઢીમાં થયો હતો. આ મામલે નેપાળ અને ભારત વચ્ચે હંમેશા વિવાદ રહ્યો છે. જોકે ભારતીય ફિલ્મો હંમેશા નેપાળમાં ખૂબ જોવાતી રહી છે અને ભારતીય ક્લાકારો પણ ત્યાં લોકપ્રિય છે. આ વિવાદ બાદ કાઠમંડુના 17 થિયેટરમાં ‘આદિપુરુષ’નું સ્ક્રિનિંગ અટકાવી દેવાયું છે.
‘સનાતનદ્રોહી’ના આરોપથી મનોજ મુંતશિર ઈમોશનલ
‘આદિપુરુષ’ના ડાયલોગ્સ પ્રખ્યાત રાઈટર મનોજ મુંતશિરે લખ્યા છે. સોશિયલ મીડિયા પર ટ્રોલિંગ અને ચોતરફી ટીકાઓની સાથે મનોજ મુંતશિર પર સનાતનદ્રોહી હોવાના આરોપ પણ લાગી રહ્યા છે. જેના કારણે મનોજ મુંતશિરે ઈમોશનલ થઈને ટ્વિટ પર જવાબ આપ્યો છે. મનોજે લખ્યું છે કે, ડાયલોગ્સમાં ફેરફાર કરાશે. દરેકની ભાવનાનું સન્માન કરવાનો પાઠ રામકથામાંથી શીખવાનો હોય છે. સાચું કે ખોટુંનો ખયાલ સમય સાથે બદ્લાતો રહે છે, પણ ભાવના રહે છે. ‘આદિપુરુષ’માં 4000થી વધુ પંક્તિઓ અને સંવાદ મેં લખ્યા છે. પાંચ પંક્તિઓ પર કેટલાકની લાગણીઓ દુભાઈ છે. જોકે સેંકડો પંક્તિઓમાં શ્રી રામનું યશગાન કર્યું છે અને માતા સીતાના સતીત્વનું વર્ણન કર્યું છે. ખબર નહીં કેમ, પણ આ કામ માટે પ્રશંસા મળી નથી. મારા જ ભાઈઓ સોશિયલ મીડિયા પર મારા માટે અશોભનીય શબ્દો લખી રહ્યા છે.
મનોજ મુંતશિરે વધુમાં જણાવ્યું હતું કે, ટીવી પર ઘણી વાર મારા પોતાના લોકો, જેમની માતાઓ માટે કવિતાઓ વાંચી છે, તેઓ મારી મા માટે અભદ્ર શબ્દો લખી રહ્યા છે. મતભેદ હોઈ શકે છે, પરંતુ મારા ભાઈઓમાં આટલી બધી કડવાશ ક્યાંથી આવી ગઈ? તેઓ શ્રી રામના દર્શનને ભૂલી ગયા, જે દરેક માને પોતાની માતા માનતા હતા. ત્રણ કલાકની ફિલ્મમાં ત્રણ મિનિટ તમારી કલ્પનાથી અલગ લખાયું હોય તેવું બની શકે, પરંતુ મારા માથા પર સનાતનદ્રોહીનું લેબલ લગાડવામાં આટલી ઉતાવળ કેમ? હું તે સમજી શક્યો નથી. શું લોકોએ જય શ્રી રામ ગીત ન સાંભળ્યું, શિવોહમ ના સાંભળ્યું, રામ સિયા રામ ના સાંભળ્યું? આદિપુરુષમાં સનાતનની આ સ્તુતિઓ મારી જ ક્લમમાંથી આવી છે. તેરી મિટ્ટી અને દેશ મેરે જેવા ગીતો પણ મારાં જ લખેલાં છે.
