લંડનઃ વિશ્વની સૌથી લોકપ્રિય મહિલાઓ પૈકીના એક સ્વ. લેડી ડાયનાએ નોકરી મેળવવા માટે ખોટી ઊંમર લખાવી હતી? પ્રિન્સેસ ડાયનાના પહેલો વર્ક કોન્ટ્રાક્ટ મળી આવ્યો છે અને આગામી દિવસોમાં તેની હરાજી પણ થવાની છે. 30મી એપ્રિલે બ્રિસ્ટોલ ખાતે યોજાનારી હરાજીમાં આ વર્ક કોન્ટ્રાક્ટના 8000 પાઉન્ડ ઉપજે તેવી સંભાવના છે. મે 1979માં લેડી ડાયનાએ નેની એજન્સી સોલ્વ માય પ્રોબ્લેમ લિ.માં નોકરી માટે આ અરજી કરી હતી.
પરંતુ ચોંકાવનારી બાબત એ છે કે કોન્ટ્રાક્ટમાં લખેલી જન્મ તારીખ પ્રમાણે લેડી ડાયના ખોટું બોલ્યા હતા. લેડી ડાયનાનો જન્મ 1 જુલાઇ 1961ના રોજ થયો હતો તેથી તે સમયે તેઓ 17 વર્ષ અને 10 મહિનાના હતા. કોન્ટ્રાક્ટમાં તેમણે જન્મ તારીખ 1 જુલાઇ 1960 દર્શાવી હતી તેથી તેમની ઉંમર 18 વર્ષ અને 10 મહિના ગણાઇ હતી. ડાયનાએ ઝડપથી નોકરી મેળવવા અને વધુ પગાર મળે તે માટે મેચ્યોર દેખાવા માટે જુઠ્ઠું બોલીને તેમની ખોટી ઉંમર દર્શાવી હતી.
