અમદાવાદઃ પાટણની હેમચંદ્રાચાર્ય ઉત્તર ગુજરાત યુનિવર્સિટીની વિદ્યાર્થિની રિકર્વ આર્ચર ભાર્ગવી ભગોરા આગામી દિવસોમાં થાઇલેન્ડમાં યોજાનારા એશિયા કપમાં તીરંદાજીની રમતમાં ભારતનું પ્રતિનિધિત્વ કરશે.
આગામી સમયમાં થાઇલેન્ડમાં એશિયા કપનું આયોજન થનારું છે, તેના માટે ભારતીય ટીમની પસંદગી માટે બે-ત્રણ દિવસ અગાઉ હરિયાણાના સોનીપત ખાતે ટ્રાયલ યોજાયા હતા, જેમાં ગુજરાતમાંથી ઉત્તર ગુજરાત યુનિવર્સિટીની રિકર્વ આર્ચર ભાર્ગવી ભગોરાએ ભાગ લઈ પોતાનો શ્રેષ્ઠ દેખાવ કરી નવમા સ્થાને રહી ભારતીય ટીમમાં સ્થાન મેળવી લીધું છે.
ભાર્ગવી ભગોરા એશિયા કપમાં પ્રથમ વખત રમી રહી છે. અગાઉ તેણીએ વર્લ્ડ યુનિવર્સિટીમાં તેમજ ખેલો ઇન્ડિયામાં સારો દેખાવ કરી મેડલ જીત્યા છે.
