જૂનાગઢઃ અશ્વપાલક રાજુભાઈ રાડાએ તેમનો 11 વર્ષનો કાઠિયાવાડી બ્રીડનો પૃથ્વીરાજ નામનો અશ્વ બિહારના એક અશ્વપાલકને રૂ. 11.51 લાખમાં વેચ્યો છે. બિહારના પટનાના અશ્વપાલકે કાઠિયાવાડી બ્રીડના સંવર્ધન માટે આ ખરીદી કરી છે.
રાજુભાઈ રાડાના જણાવ્યા અનુસાર, વર્તમાન સમયમાં કાઠિયાવાડી અશ્વની માગમાં નોંધપાત્ર વધારો થયો છે. આ અશ્વ 20થી 100 કિલોમીટર સુધીની સ્પર્ધાઓમાં વિજેતા બની ચૂક્યો છે. પૃથ્વીરાજ નામનો આ અશ્વ અનેક સ્પર્ધાઓમાં વિજયી રહ્યો છે.
ઐતિહાસિક રીતે કાઠિયાવાડી અશ્વ રાજા-મહારાજાઓ અને નવાબો દ્વારા યુદ્ધ અને શોખ માટે પાળવામાં આવતા હતા. જો કે હવે ગુજરાત અને કાઠિયાવાડમાં આ પ્રજાતિના અશ્વની સંખ્યા ઘટી રહી છે. બીજી તરફ અન્ય રાજ્યોમાં તેમની માગ વધી રહી છે.
ખરીદનાર બિહારના અશ્વપાલક પાસે પહેલેથી જ ઘણી ગીર ગાયો અને કાઠિયાવાડી માદા અશ્વો છે. તેઓ આ અશ્વનો ઉપયોગ બ્રીડિંગ માટે કરશે. કાઠિયાવાડી અશ્વ તેમની વિશિષ્ટ રહેણીકરણી અને હાલચાલથી ઓળખાય છે. હાલમાં ઘણા બોલિવૂડ અભિનેતાઓ પણ આ પ્રજાતિના અશ્વ ધરાવે છે.
