મહારાષ્ટ્રની કંપનીએ હળદરની ખેતીના નામે રાજકોટના વેપારીને છેતર્યો

રાજકોટઃ વેપારીને હળદરની ખેતીમાં ઊંચા વળતરની લાલચ આપી મહારાષ્ટ્રની એ.એસ. એગ્રિ એન્ડ એક્વા એલએલપી કંપનીના સંચાલકો સહિતની ટોળકીએ રૂ. 64.80 કરોડની છેતરપિંડી આચરી છે. એગ્રિમેન્ટ મુજબના રૂ. 1.94 અબજ ન ચૂકવવાના કૌભાંડમાં ક્રાઇમબ્રાન્ચે મહારાષ્ટ્રના 19 આરોપી વિરુદ્ધ ફરિયાદ નોંધી છે. રાજકોટના ઇતિહાસની આ સૌથી મોટી છેતરપિંડીના કેસમાં મહારાષ્ટ્રથી 4 આરોપીની ધરપકડ કરી 10 દિવસના રિમાન્ડ મેળવ્યા છે.
છેતરપિંડી અંગે ફરિયાદી દ્વારા પોલીસ કમિશનરને અરજી કરાઈ હતી, જેના આધારે સોમવારે ક્રાઇમબ્રાન્ચની અલગ-અલગ ટીમ બનાવી મહારાષ્ટ્ર મોકલી આરોપીઓને ઝડપી પાડવા તપાસ હાથ ધરાઈ હતી. આ દરમિયાન મહારાષ્ટ્રના જુદાં-જુદાં સ્થળોથી 4 આરોપીને ઝડપી લેવામાં પોલીસને સફળતા મળી છે, જેમાં પ્રવીણ વામન પથારે, હર્ષલ મહાદેવરાવ ઓઝે, વૈભવ વિલાસરાવ કોટલાપુરે અને હિરેન દિલીપભાઈ પટેલનો સમાવેશ થાય છે.