રૂ. 1000 કરોડની ફિલ્મઃ શાહરુખની ઇચ્છા સાકાર

શાહરુખ ખાનની ફિલ્મ ‘જવાન’એ બોક્સ ઓફિસ પર ધમાલ મચાવી છે. ફિલ્મે વર્લ્ડવાઇડ 1,000 કરોડ રૂપિયા કરતાં વધારે રકમની કમાણી કરી લીધી છે. શાહરુખ પોતાની આ ફિલ્મની સફળતાથી ખૂબ ખુશ છે. શાહરુખ પોતાની ફિલ્મને આટલી સફળ બનાવવા માટે ફેન્સનો વારંવાર આભાર માની ચૂક્યો છે. દરમિયાન શાહરુખનો એક વીડિયો સોશિયલ મીડિયા પર વાઇરલ થયો છે જેમાં જોવા મળી રહ્યું છે કે 10 વર્ષ પહેલાં શાહરુખે કહ્યું હતું કે તે ઇચ્છે છે કે તેની કોઈ ફિલ્મ 1,000 કરોડની હોય. વીડિયોમાં શાહરુખને સવાલ પુછાય છે કે, જો તમારી કોઈ ફિલ્મ 100 કરોડ રૂપિયા કમાય તો તમને કેવું લાગશે? તેના જવાબમાં શાહરુખે કહ્યું હતું કે, ‘આટલો આંકડો ઓછો ગણાશે. આપણે તેને 1,000 કરોડ કરીએ. હું ઇચ્છું છું કે હું સવારે ઊઠું અને મને ખબર પડે કે મારી ફિલ્મ 1,000 કરોડ કમાઈ રહી છે. હું મારી જાતને 100 કરોડ પૂરતી મર્યાદિત કેમ રાખું?’
શાહરુખના આ વીડિયો પર ફેન્સ ખૂબ કોમેન્ટ્સ કરી રહ્યા છે. કોઈએ લખ્યું હતું કે, ‘વાહ આને કહેવાય કિંગ ખાન, પહેલા જ જાહેરાત કરી દીધી હતી...’ એક અન્ય ફેને લખ્યું હતું કે ‘શાહરુખનો પોતાની જાત પરનો વિશ્વાસ જ તેની પ્રતિભા છે.’