લંડન કોન્સર્ટમાં સિંગર કરણ ઔજલા પર બૂટ ફેંકાયું

હાલ યૂકે ટૂર પર પહોંચેલા પંજાબી સિંગર કરણ ઔજલા પર તાજેતરમાં લંડન ખાતે શો દરમિયાન દર્શકોમાંથી કોઇએ બૂટ ફેકતાં તેણે થોડા સમય માટે શો અટકાવી દીધો હતો. લંડનના ઓ-ટુ એરેનામાં સિંગર સાથે આ ઘટના બની હતી. ખૂબ જ લોકપ્રિય બનેલા ‘તૌબા તૌબા...’નો સિંગર ગીત ગાઈ રહ્યો હતો ત્યારે જ દર્શકોમાંથી તેના પર જોડું ફેંકાયું હતું. આ બૂટ કરણને લાગીને બાજુમાં પડયું હતું. એક રિપોર્ટ અનુસાર કરણે શો રોકીને તરત પછ્યું હતું કે ‘ઊભા રહો, તે કોણ હતો? હું તને સ્ટેજ પર બોલાવું છું... આવી જા અત્યારે જ આમનોસામનો કરી લઈએ છીએ. આ તું શું કરવા પ્રયાસ કરે છે? કમસે કમ બીજાની ઇજ્જત તો કરો.’ આ દરમિયાન તેણે એમ પણ કહ્યું હતું કે હું એટલું પણ ખરાબ નથી ગાતો કે તમે મને જોડાં મારો, છતાં જો તમારામાંથી કોઈને મારાથી કોઈ તકલીફ હોય તો સીધા મંચ પર આવીને વાત કરો કેમ કે હું કંઇ પણ ખોટું નથી કહી રહ્યો. એક વીડિયોમાં દેખાય છે કે જોડું ફેંકનારા વ્યક્તિને સિક્યોરિટી ગાર્ડ્ઝ ઇવેન્ટ વેન્યૂમાંથી બહાર લઇ જઇ રહ્યા છે.