નવી દિલ્હી: ભારતની મહિલા અને પુરુષોની ખોખો ટીમે નેપાળને હરાવીને પહેલા ખો-ખો વર્લ્ડ કપ પર કબ્જો કર્યો છે. રવિવારે રાત્રે ઈન્દિરા ગાંધી સ્ટેડિયમમાં પહેલો ખો-ખો વર્લ્ડ કપ 2025નો ખિતાબ જીતીને ભારતીય પુરુષ ટીમે પણ પોતાનું નામ ઈતિહાસમાં સામેલ કર્યું હતું. કેપ્ટન પ્રતીક વાઇકલ અને ટૂર્નામેન્ટના સ્ટાર ખેલાડી રામજી કશ્યપના શાનદાર પ્રદર્શનના જોરે, ભારતીય મેન્સ ટીમે ફાઈનલમાં નેપાળને 54-36થી પરાજય આપ્યો હતો. આ પહેલાં ભારતીય મહિલા ટીમે એક શાનદાર મુકાબલામાં નેપાળ પર દબદબો બનાવતા 78-40થી જીત મેળવી હતી અને ચેમ્પિયનો ખિતાબ જીત્યો હતો. રમતના પ્રથમ ટર્નમાં ભારતે 34 પોઇન્ટ બનાવ્યા હતા. જ્યારે નેપાળ એક પણ પોઈન્ટ લઈ શક્યું ન હતું.
