સાઉથમ્પટનઃ જોની બેરિસ્ટોરના અણનમ ૬૦ રનની મદદથી ઇંગ્લેન્ડે ત્રણ મેચની સિરીઝની પ્રથમ ટી૨૦ ઇન્ટરનેશનલ ક્રિકેટ મેચમાં સાઉથ આફ્રિકાને આસાનીથી નવ વિકેટે હરાવ્યું હતું. આ સાથે જ ઈંગ્લેન્ડે શ્રેણીમાં ૧-૦ની લીડ મેળવી લીધી છે. ટોસ જીતીને પ્રથમ બેટિંગ કરનાર સાઉથ આફ્રિકાએ ત્રણ વિકેટે ૧૪૨ રન કર્યા હતા, જેના જવાબમાં ઇંગ્લેન્ડે ૩૩ બોલ બાકી રાખીને વિજય મેળવ્યો હતો. મેન ઓફ ધ મેચ બેરિસ્ટોએ ૩૫ બોલનો સામનો કરીને છ બાઉન્ડ્રી તથા બે સિક્સર ફટકારી હતી.
ઇંગ્લેન્ડની ઇનિંગ્સમાં ઓપનર જેસન રોયે ૧૪ બોલમાં ૨૮ રન તથા એલેક્સ હાલેસે ૩૮ બોલમાં ત્રણ બાઉન્ડ્રી તથા બે સિક્સર વડે ૪૭ રન બનાવ્યા હતા. હાલેસ અને બેરિસ્ટો વચ્ચે બીજી વિકેટ માટે અણનમ ૯૮ રનની ભાગીદારી નોંધાઈ હતી. સાઉથ આફ્રિકાની ઇનિંગ્સમાં ડીવિલિયર્સે ૫૮ બલમાં અણનમ ૬૫ તથા બેહાર્ડિને ૫૨ બલમાં અણનમ ૬૪ રન ફટકાર્યા હતા. બન્નેએ ચોથી વિકેટ સાટે અણનમ ૧૧૦ રનની ભાગીદારી નોંધાવી હતી.
