ડોડોમા, નાઈરોબીઃ ઈસ્ટ આફ્રિકા ક્ષેત્રમાં 104 બિલિયન ડોલરના ગ્રોસ ડોમેસ્ટિક પ્રોડક્ટ (GDP) સાથે કેન્યાનું અર્થતંત્ર સૌથી મોટું હોવાં સાથે વ્યાપક અને વૈવિધ્યસભર છે. 2007-2022ના સમયગાળામાં 4.8 ટકાની સરેરાશ વાર્ષિક વૃદ્ધિ સાથે તેનો વિસ્તાર થયો છે. જોકે, રવાન્ડા અને ટાન્ઝાનિયા તરફથી કેન્યાને ભારે હરીફાઈનો સામનો કરવો પડે તેવી સ્થિતિ છે. ટાન્ઝાનિયાનું 80 બિલિયન ડોલરનું અર્થતંત્ર કેન્યાને ઓવરટેક કરી ઈસ્ટ આફ્રિકાનું આર્થિક પાવરહાઉસ બની શકે છે.
નવેમ્બરમાં ઈસ્ટ આફ્રિકન કન્ટ્રીઝ (EAC)ના વડાઓની શિખર પરિષદમાં કેન્યાના પ્રેસિડેન્ટ વિલિયમ રુટોએ સ્વીકાર્યું હતું કે ટાન્ઝાનિયા EAC બ્લોકમાં વેપારજથ્થા મામલે કેન્યાથી આગળ નીકળી ગયું છે. વિશ્વ બેન્કના કન્ટેઈનર પોર્ટ પરફોર્મન્સ ઈન્ડેક્સમાં દાર એસ સલામનું આધુનિક પોર્ટ ઓછાં ચાર્જીસ અને બહેતર ઈન્ફ્રાસ્ટ્રક્ચર સાથે વધુ ટ્રાન્સપોર્ટરોને આકર્ષી મોમ્બાસા પોર્ટથી આગળ નીકળી ગયું છે. ટાન્ઝાનિયા ટુરિઝમ અને સર્વિસીસ સેક્ટરમાં પણ કેન્યાને સતત હંફાવી રહ્યું છે. ગત વર્ષોમાં ટાન્ઝાનિયાની નાણાકીય સ્થિતિ પણ ઘણી મજબૂત બની છે. તેનો ઋણ-જીડીપી રેશિયો પણ 55 ટકાના બેન્ચમાર્કથી ઘણો નીચો છે તેમજ નોન-પરફોર્મિંગ લોન્સનું પ્રમાણ પણ ઓછું છે.
માર્કેટ ઈકોનોમીના પ્રણેતા કેન્યાએ ભારે ઝડપથી આર્થિક ઉદારીકરણને અપનાવી લીધું હતું. આ સમયે ટાન્ઝાનિયા જ્યુલિયસ ન્યેરેરના ઉજામા સહકારી આર્થિક મોડેલને આગળ વધારી રહ્યું હતું જ્યારે યુગાન્ડા લશ્કરી તાનાશાહીની પકડમાં હતું. જો ટાન્ઝાનિયા તેના માળખાકીય સુધારાઓને યોગ્યપણે આગળ ધપાવતું રહેશે તો ઈસ્ટ આફ્રિકન કોમ્યુનિટીના સર્વોચ્ચ શિખરેથી કેન્યાને હટાવી દેવાની ક્ષમતા પણ ધરાવે છે.
