કચ્છ પંથકને ધ્રુજાવે છે ભૂકંપના આંચકા

ભૂજઃ ધરતીની ધ્રુજારી કચ્છનો કેડો મૂકતી નથી. કચ્છ પંથકમાં બે દિવસમાં હળવા અને મધ્યમ ૧૨ કંપન નોંધાયા હતા, તેમાંના ૧૧ તો માત્ર પૂર્વ કચ્છમાં નોંધાયા છે. આ પરિસ્થિતિને કારણે લોકોમાં ભયનો માહોલ સર્જાયો છે. ત્રીજી મેના રોજ મોડી સાંજે સાંજે દુધઈ નજીક ૩.૩ની તીવ્રતાના આંચકાએ ધરા ધ્રૂજાવ્યા પછી બીજા જ દિવસે, ચોથી મેની ભાંગતી રાતે ખાવડાથી ઉત્તર-પશ્ચિમે મોટા રણમાં ૩.૨ની તીવ્રતાનો આંચકો આવ્યો હતો. આ પછી રાપર વિસ્તારમાં ૨.૬નું કંપન નોંધાયું હતું. અન્ય એક હળવો આંચકો ભચાઉ મથકમાં પણ નોંધાયો હતો. આ પૂર્વે ત્રીજી મેના રોજ જે આઠ કંપન આવ્યા તેમાં દુધઈના ૩.૩ આંચકા સિવાય ધોળાવીરામાં ત્રણ, ભચાઉ વિસ્તારમાં બે, રાપરમાં એક અને દુધઈમાં એક આંચકો નોંધાયો હતો.