ગાંધીનગર: પેરિસ ખાતે 26 જુલાઈથી 11 ઓગસ્ટ દરમિયાન યોજાનારી ઓલિમ્પિક્સ 2024 માટે ગુજરાતના ત્રણ ખેલાડીઓ જનરલ વ્યક્તિગત રમતમાં ક્વોલિફાઇ થયા છે. જ્યારે પેરિસ પેરા ઓલિમ્પિક્સ-2024 માટે રાજ્યના બે ખેલાડીઓ ક્વોલિફાઈ થયા છે. જનરલ ગેમ્સમાં ક્વોલિફાઈડ થયેલા ખેલાડીઓમાં - ટેબલ ટેનિસમાં હરમિત દેસાઈ અને માનવ ઠક્કર તથા શૂટિંગમાં ઇલેવેનિલ વાલારિવાન સામેલ છે. જ્યારે પેરા ગેમ્સમાં પેરા ટેબલ ટેનિસમાં ભાવિના પટેલ તથા સોનલ પટેલ સમાવિષ્ટ છે. સૂત્રો કહે છે કે, જનરલ ગેમ્સમાં સ્વિમિંગમાં આઈએએસ વિજય નેહરાનો પુત્ર આયર્ન નેહરા તથા માના પટેલ ક્વોલિફિકેશન રાઉન્ડમાં જ ફેલ થઈ ગયા છે. ટોક્યો ઓલિમ્પિકસની સરખામણીએ પેરિસ ઓલિમ્પિક્સમાં ગુજરાત તરફથી ઓછા ખેલાડી ભાગ લઈ રહ્યાં છે. ટોક્યો રમતોત્સવમાં જનરલ ગેમ્સમાં ત્રણ ખેલાડીઓએ અને પેરા ગેમ્સમાં ત્રણ ખેલાડીઓએ રાજ્યનું પ્રતિનિધિત્વ કર્યું હતું.
