વડોદરાઃ કિશોરીને ધાર્મિક માયાજાળમાં ફસાવીને તેની પર પાંચ વર્ષમાં ૧૨ વખત દુષ્કર્મ આચરવાના કેસમાં પાખંડી ગુરુ પ્રશાંત ઉપાધ્યાયના બે દિવસના રિમાન્ડ નવમી નવેમ્બરે મંજૂર થયાં હતાં. ગોત્રી પોલીસે તેની સઘન પૂછપરછ શરૂ કરી હતી. રિમાન્ડ દરમિયાન પ્રશાંતે તેની ધાર્મિક માયાજાળમાં કેટલી મહિલાઓને ફસાવી છે અને તેમનું શારીરિક શોષણ કર્યું છે તે અંગે પૂછપરછ શરૂ કરાઈ હતી. આ ઉપરાંત પ્રશાંતે તેના મોબાઇલમાં પીડિતાનો વીડિયો ઉતાર્યો હતો તેની તપાસ માટે પ્રશાંતનો મોબાઇલ પણ કબજે કરવાના પ્રયાસ શરૂ કરાયા હતા. પ્રશાંત અંગેની ચર્ચામાં જણાયું છે કે, પ્રશાંત મસાજ કરાવવાનો શોખીન હતો. પગ દબાવવાના બહાને મહિલાઓને રૂમમાં બોલાવતો, કેટલી મહિલાઓના વીડિયો ઉતાર્યા હતા.
પ્રશાંતની ૨ સેવિકાઓનો કોઇ પત્તો નથી
પ્રશાંત ઉપાધ્યાયની બે સેવિકાઓ દીક્ષા જસવાની ઉર્ફે સીમા અને ઉન્નતિ જોષીનો હજી સુધી કોઇ પત્તો મળ્યો નથી. પોલીસ અલગ-અલગ ટીમો બનાવીને બંનેની શોધખોળ કરી રહી છે. અગાઉ બહાર આવ્યું હતું કે દીક્ષા હાલ દુબઇ છે, જોકે તે દુબઇમાં જ છે કે નહીં તેના કોઇ પુરાવા મળ્યા નથી. ગુજરાતી ફિલ્મોની હિરોઇન ઉન્નતિ જોષીની પણ શોધખોળ ચાલે છે. પ્રશાંતની સેવિકા દિશા જોન હાલ જેલમાં બંધ છે.
૩ વીડિયો વાઈરલ
દરમિયાન પાખંડી પ્રશાંત અંગે ૩ સેવિકાના વીડિયો વાઈરલ થયાં છે. દિશા જોન વીડિયોમાં કહે છે કે, હેપ્પી બર્થ ડે ગુરુજી... હું ખૂબ જ ઉત્સાહિત છું. મારી જિંદગીમાં આવવા બદલ ગુરુજી તમારો આભાર. તમે મારી ખૂબ જ કાળજી રાખો છો. તમારી પાસેથી ખૂબ શીખવા મળ્યું છે. તમારા કારણે હું યુનિવર્સની સૌથી લકી વ્યક્તિ છું. હું લિમિટથી વધારે પ્રેમ કરું છું. આઇ વિશ યુ વેરી વેરી હેપ્પી બર્થ ડે... આઇ લવ યુ ગુરુજી.
ગુજરાતી ફિલ્મોની અભિનેત્રી ઉન્નતિ જોષી વીડિયોમાં કહે છે કે, જન્મદિવસની ખૂબ ખૂબ વધાઇ, ગુરુજી જન્મદિવસ એવું તો હું કહી જ ન શકું, હા અવતરણ દિવસ જરૂર કહીશ. કારણ કે જન્મ તો મનુષ્યનો થાય છે, ઇશ્વરનું તો અવતરણ જ થાય છે અને આપનું અમારા જીવનમાં અવતરણ જ થયું છે. આપનું અમારા જીવનમાં આગમન એ અમારા પણ એક દૈવ સ્વરૂપ બનાવવા માટે જ છે. બીજી તરફ દીક્ષા વીડિયોમાં કહે છે કે, તમારા જન્મદિવસે તમને ખૂબ ખૂબ બધાઇ. હું સૌથી પહેલાં તમારો આભાર માનું છું કે, બધા કહે તો છે કે ચારે તરફ પરમાત્માથી ભરપૂર છે, પણ એની પ્રતીતિ તમે કરાવી. તમે બતાવ્યું કે, તમારી અંદર અને તમારી બહાર ઇશ્વર ભરપૂર છે. બસ એક નજર તમારે નાંખવાની છે.
