રાજપીપળા: લોકસભાની ચૂંટણીમાં મારી જ પાર્ટીના લોકોએ વિપક્ષો સાથે મળીને મને હરાવવા આકાશપાતાળ એક કરી દીધાં હતાં પણ તેઓ ફાવ્યાં નહી તેમ ભરૂચના સાંસદ મનસુખ વસાવાનું કહેવું છે. રાજપીપળામાં રાજપૂત સમાજ અને રાજપૂત યુવક મંડળના ઉપક્રમે ભરૂચ અને છોટાઉદેપુરના સાંસદોનો સન્માન સમારંભ યોજાયો હતો. જેમાં રાજપીપળા સ્ટેટના રાજપરિવારના સભ્યો, ધારાસભ્ય ડો. દર્શના દેશમુખ સહિતના મહેમાનો અને મોટી સંખ્યામાં આગેવાનો હાજર રહ્યાં હતાં. આ કાર્યક્રમમાં સાંસદ મનસુખ વસાવાએ ફરી એક વખત તેમના હિતશત્રુઓને આડેહાથ લેતા કહ્યું હતું કે, મને હરાવવા માટે મારી જ પાર્ટીના નેતાઓએ ભરચક્ક પ્રયાસ કર્યા હતાં.
હરીફ ઉમેદવાર ચૈતર વસાવા પર પ્રહાર કરતાં સાંસદે કહ્યું હતું કે, આ બધા લોકો લોકસભાની ચૂંટણી કેવા બણગાં ફૂંક્તા હતા અને જોરજોરથી બોલતા હતા કે અમે જ જીતવાના છીએ. અને મારા વિશે નેગેટિવ વાતો કરતા હતા પણ એ લોકો કોઈ જગ્યાએ ફાવ્યા નથી, અને ફાવવાના પણ નથી.
