વડોદરાઃ કરજણ પાસેના હાઈવે પર છઠ્ઠી નવેમ્બરે રાતે પૂરપાટ દોડતી રાજસ્થાન પાસિંગની એક લકઝરી બસના ચાલકે ભરુચથી વડોદરા તરફ જતી એક પછી એક એમ ત્રણ કારને અડફેટે લેતાં સર્જાયેલા અકસ્માતમાં બે કાર ચગદાઈ ગઈ હતી. એક કાર પલ્ટી ખાઈ ગઈ હતી. આ અકસ્માતમાં ત્રણ પુરુષો, બે સ્ત્રીઓ અને ચાર બાળકોનાં કરુણ મોત નીપજ્યાં હતાં જયારે ૧ બાળક સહિત ત્રણ મુસાફરોને ગંભીર ઈજાઓ પહોંચી હતી.
બનાવના પગલે હાઈવે પર બંને તરફ એક કિલોમીટર સુધી ટ્રાફિકજામ થઈ ગયો હતો. પોલીસ કાફલાએ ઘટનાસ્થળે દોડી જઈ મૃતદેહોને ઘટનાસ્થળેથી ખસેડી ઈજાગ્રસ્તોને કરજણની ખાનગી હોસ્પિટલમાં ખસેડયા હતા.
