અમદાવાદઃ સિડનીની ફ્લાઈટ સ્કૂલમાં મુખ્ય શિક્ષક સાકેત કપૂર (ઉં ૩૮) અને તેમની વિદ્યાર્થિની શિપ્રા શર્મા (ઉં ૨૬)નું ચોથી નવેમ્બરે વિમાન અકસ્માતમાં મૃત્યુ થયું હતું. સાકેત કપૂર સિડનીમાં સોર ફ્લાઈટ સ્કૂલના સિનિયર ઈન્સ્ટ્રક્ટર હતા. સાકેત કપૂર વિદ્યાર્થિની શિપ્રાને ટચ એન્ડ ગો ટેકનિક શીખવતા હતા ત્યારે અકસ્માત સર્જાયો હોવાનું જાણવા મળ્યું હતું. તેમણે ઓરેન્જ એરપોર્ટથી ઉડાન ભરી હતી અને કારકોઅર પાસે અકસ્માત સર્જાયો હતો. સોર એવિએશનના ચીફ એક્ઝિક્યુટિવ ડોન ગ્રોવરે જણાવ્યું હતું કે, આ દુઃખજનક વાત છે. વિમાન અકસ્માતના કારણો અંગેની વિગતો અસ્પષ્ટ છે. વધુ તપાસ બાદ સમગ્ર હકીકત બહાર આવશે. તપાસમાં એવિએશન કંપની દ્વારા દરેક સંભવિત સહાય પૂરી પડાઈ રહી છે. સાકેત કપૂરનો પરિવાર સિડનીમાં રહેતો હતો, પણ તેમના માતા-પિતા અમદાવાદમાં આનંદનગરમાં રહેતા હતા.
