જામનગરમાં ૧૭ વર્ષની સગીરા પર સામૂહિક બળાત્કાર

જામનગરઃ ઉત્તર પ્રદેશના હાથરસમાં યુવતી પર સામૂહિક બળાત્કાર અને તેની કરપીણ હત્યાના કેસમાં ભભૂકી ઉઠેલો રોષ હજી શમ્યો નથી ત્યાં જામનગરમાં એક સગીરા પર ૪ નરાધમોએ સામૂહિક બળાત્કાર ગુજાર્યો હોવાના સમાચાર ચોથી ઓક્ટોબરે જાહેર થયાં છે. પોલીસે આ કેસમાં ૩ નરાધમોની ધરપકડ કરી છે.
જામનગર શહેરમાં રહેતી ૧૭ વર્ષ અને ર માસની સગીરાને ૨૮મી સપ્ટેમ્બરે ૪ જણા બુધો ઉર્ફે દર્શન ઘેલુભાઈ ભાટિયા, મિલન ડાડુભાઈ ભાટિયા, દેવકરણ જેશાભાઈ ગઢવી અને મોહિત કિશોરભાઈ આંબલિયા ફોસલાવીને મોહિતના ઘરે લઈ ગયા. ત્યાં ચારેય નરાધમોએ વારાફરતી સગીરા પર દુષ્કૃત્ય આચર્યું હતું. એ પછી અત્યાચારીઓ સગીરાને તેના ઘર પાસે મૂકીને ચાલ્યા ગયા હતાં.
સગીરાને પીડા થતાં પછીથી તેણે માતા-પિતાને વાત કરી હતી અને સગીરાએ સિટી સી ડિવિઝનમાં ફરિયાદ નોંધાવતાં પોલીસે પોક્સો, દુષ્કર્મ સહિતની કલમ હેઠળ ગુનો નોંધીને તપાસ આદરી હતી. આ કેસની જવાબદારી મહિલા પોલીસ સ્ટેશનના પીઆઈને સોંપવામાં આવી હતી. તાત્કાલિક એલસીબી અને એસઓજીની ટીમે ૩ નરાધમો બુધો ઉર્ફે દર્શન, મિલન અને દેવકરણની ધરપકડ કરી હતી. કોરોનાની ગાઈડલાઈનને અનુસરીને ત્રણેયની તપાસ બાદ રિમાન્ડ માટેની તજવીજ હાથ ધરવામાં આવી છે. જ્યારે ફરાર મોહિતની શોધખોળ આરંભવામાં આવી હતી.