ટ્રક અને કાર વચ્ચે અકસ્માતઃ સાસુ-વહુ, ભાઇ-બહેન સહિત ૪નાં મોત

અમરેલીઃ બગસરા-અમરેલી રોડ પર બાબાપુર ગામ નજીક ૨૦મી જુલાઈએ કાર અને ટ્રક વચ્ચેના અકસ્માતમાં એક જ પરિવારનાં ૪ જણાના ઘટનાસ્થળે જ મોત થયાં હતાં. મૃતકમાં સાસુ-વહુ અને બે ભાઈ-બહેન બાળકોનો સમાવેશ થાય છે. આ ઘટનામાં બે વ્યક્તિને ગંભીર સહિત કુલ ૬ને ઇજા થઈ છે. ઘાયલોમાંથી પાંચને રાજકોટ હોસ્પિટલે જ્યારે એકને અમરેલી હોસ્પિટલમાં ખસેડાયાં છે. તમામ મૃતક ગાવડકા ગામના રહેવાસી હતાં. કોરોના મહામારીમાં સરકારની ગાઇડલાન વિરુદ્ધ એક જ કારમાં ૭ લોકો સવાર હતા.
ઘટનાસ્થળે લોકોના ટોળા
આ અકસ્માત અંગે ત્યાં હાજર લોકોએ જણાવ્યું કે, કાર અને ટ્રક ધડાકાભેર એક બીજા સાથે ભટકાતાં ઘટના બની હતી. ઘટનાને પગલે લોકોનાં ટોળા એકત્ર થઈ ગયાં હતાં અને કારમાં ફસાયેલા લોકોને બહાર કાઢવામાં આવ્યાં
હતાં. તુરંત જ ૧૦૮ મારફતે ઇજાગ્રસ્તોને હોસ્પિટલ ખસેડાયા હતા.