ધનાઢ્ય બિલ્ડરના આપઘાતના પ્રયત્ન પર ઢાંકપિછોડો?

જામનગરઃ શહેરમાં જમીન મકાનોના મોટા વ્યવસાય સાથે સંકળાયેલા અને રોલ્સરોય્સ જેવી મોંઘીદાટ ગાડીઓનો કાફલો ધરાવતા બિલ્ડર મેરામણભાઈ પરમાર દ્વારા આત્મહત્યાનો પ્રયાસ કરાયો હોવાની ચર્ચા ચકડોળે ચડી છે ત્યારે આ બનાવ અંગે પોલીસ દ્વારા મૌન સેવાયું છે. જી. જી. હોસ્પિટલના પોલીસ સ્ટાફ દ્વારા પણ બિલ્ડરનું કોઈ નિવેદન પણ લેવાયા પહેલાં જ બિલ્ડરને રજા આપી દેવાઈ હોવાની ચર્ચા છે. રજા આપી દેવાયા પછી બિલ્ડર પોતાના ફાર્મહાઉસમાં આરામ કરી રહ્યા હોવાનું અને હાલ તેઓની તબિયત સારી હોવાનું કહેવાય છે. જોકે તેમણે કયા કારણસર આ પગલું ભર્યું તે અંગે પોલીસ દ્વારા કોઈ જાણકારી અપાઈ નથી. બિલ્ડરના પરિવારે પણ આ અંગે મૌન સેવ્યું હોવાથી આ અંગે અનેક ચર્ચાઓ ચાલી રહી છે.