સુરેન્દ્રનગરના ૩ ભાજપી નેતાની કાર અલખનંદામાં ખાબકીઃ ૧નું મોત

સુરેન્દ્રનગર: સુરેન્દ્રનગરથી કેદારનાથ, બદ્રીનાથ અને હરિદ્વારની યાત્રાએ ગયેલા ભાજપના આગેવાનોની કાર જોશીમઠ માટે અલખનંદા નદીની ઊંડી ખીણમાં ખાબકી હતી. આ ઘટનામાં જિલ્લા યુવા ભાજપ પ્રમુખનું મોત થયું હતું જ્યારે ગંભીર રીતે ઘાયલ થયેલા લીંબડી તાલુકા યુવા ભાજપ પ્રમુખ અને કારના ચાલક પાણીના ધસમસતા પ્રવાહમાં તણાઇ જવાને કારણે લાપતા થયા હતા.
જિલ્લા ભાજપ મહામંત્રીનો જોકે આબાદ બચાવ થયો હતો. સુરેન્દ્રનગર જિલ્લા ભાજપ મહામંત્રી હિતેન્દ્રસિંહ ચૌહાણ જિલ્લા યુવા ભાજપ પ્રમુખ મૃગેશભાઇ રાઠોડ અને લીંબડી તાલુકા યુવા ભાજપ પ્રમુખ ક્રિપાલસિંહ ઝાલા ૫મી નવેમ્બરે કેદારનાથ, બદ્રીનાથ અને હરિદ્વારના દર્શન કરીને ઇનોવા કારમાં દેહરાદૂન આવી રહ્યા હતા ત્યારે જોશીમઠ પાસે ચાલકે સ્ટીયરિંગ પર કાબૂ ગુમાવતાં કાર ખાઇમાં પડી હતી.