જોડિયા બહેનો એબી અને બ્રિટ્ટેની હેન્સલ જન્મથી જ જોડાયેલું શરીર ધરાવતી બહેનો છે. ધડ બે પણ શરીર એક ધરાવતી વ્યક્તિને તબીબી ભાષામાં કોન્જોઇન્ડ ટ્વીન્સ તરીકે ઓળખાય છે. આવી આ બહેનોએ અમેરિકન આર્મી નર્સ જોશ બોલિંગ સાથે પ્રભુતામાં પગલાં માંડયા છે. 1990માં જન્મેલી બન્ને બહેનો વર્ષ 1996માં ધ ઓપરા વિન્ફ્રે શોમાં ચમક્યા બાદ દુનિયાભરમાં લોકપ્રિય બની ગઇ હતી. વીતેલા સપ્તાહે એક રિપોર્ટમાં જણાવાયું હતું કે બંનેએ એક નર્સ અને યુએસ આર્મીમાંથી રિટાયર થયેલા જોશ બોલિંગ સાથે 2021માં જ લગ્ન કરી લીધા છે. તેમના લગ્નનો એક વીડિયો પણ ઝડપથી વાયરલ થઇ રહ્યો છે. હેન્સલ બહેનોની ફેસબુક પ્રોફાઇલ તસવીરથી જાણવા મળ્યું છે કે આ તેમના લગ્નની તસવીર છે. જેમાં વેડિંગ ડ્રેસમાં આ જોડકી બહેનો ઉભી છે. ઉલ્લેખનીય છે કે આ બહેનો હાલમાં એક ટીચર તરીકે ફરજ બજાવી રહી છે અને તે પાંચમા ધોરણના બાળકોને ભણાવે છે. બંને પોતાના જન્મસ્થળ અને વતન મિનેસોટામાં રહે છે.
