મોદી ફરી ભારતના વડાપ્રધાન બનશેઃ પાક. અમેરિકન બિલિયોનેર

વોશિંગ્ટનઃ પાકિસ્તાની મૂળના અમેરિકન બિલિયોનેર બિઝનેસમેન સાજિદ તરારનું કહેવું છે કે ભારતમાં ચાલી રહેલી ચૂંટણીઓમાં ભાજપ સતત ત્રીજી વખત જીત મેળવશે અને નરેન્દ્ર મોદી ફરીથી દેશના વડાપ્રધાન બનશે. તરારે કહ્યું છે કે નરેન્દ્ર મોદી એક મજબૂત નેતા છે જેઓ ભારતને નવી ઉંચાઈઓ પર લઈ ગયા છે.
બાલ્ટીમોર નિવાસી પાકિસ્તાની અમેરિકન બિઝનેસમેન સાજિદ તરારે કહ્યું છે કે મોદી માત્ર ભારત માટે જ સારા નથી પરંતુ તે સમગ્ર વિશ્વ માટે પણ એક સારા નેતા સાબિત થઈ રહ્યા છે.
સાજીદ તરારે કહ્યું હતું કે પાકિસ્તાનને પણ મોદી જેવા નેતાની જરૂર છે. તેમણે આશા વ્યક્ત કરી હતી કે પાકિસ્તાનને પણ મોદી જેવો નેતા મળશે.
સાજિદ તરારે કહ્યું હતું કે દરેક જગ્યાએ એવું કહેવાઇ રહ્યું છે કે નરેન્દ્ર મોદી ભારતના આગામી વડાપ્રધાન બનશે. તેમણે કહ્યું, ‘આ કોઈ ચમત્કારથી ઓછું નથી કે ભારતમાં 97 કરોડ લોકો તેમના મતાધિકારનો ઉપયોગ કરી રહ્યા છે. ભારત સૌથી મોટી લોકશાહી છે. હું ત્યાં મોદીજીની લોકપ્રિયતા અને 2024માં ભારતનો અદભૂત ઉદય જોઈ રહ્યો છું. સાજિદ તરાર 1990ના દાયકામાં પાકિસ્તાનથી આવીને અમેરિકામાં સ્થાયી થયા હતાં.