બ્રાઝિલિયાઃ જો કોઈ આપણને પૂછે કે સૌથી મોંઘી ગાયની કિંમત કેટલી? તો આપણે રૂપિયા 5 લાખ કે 10 લાખ કહીએ, પરંતુ તમને જાણીને નવાઈ લાગશે કે એક ગાય 40 કરોડ રૂપિયામાં વેચાઈ છે. હા, પૂરા 40 કરોડમાં, એટલું જ નહીં, આ ગાયનું ભારત સાથે ગાઢ જોડાણ છે. તેની ખાસિયતો જાણીને તમને પણ આશ્ચર્ય થશે. પ્રાણીઓની હરાજીની દુનિયામાં આ એક નવો રેકોર્ડ છે.
આ ગાય આંધ્ર પ્રદેશના નેલ્લોરની છે. તે વિયાટિના-19 એફઆઇવી મારા ઇમોવિસ નામથી ઓળખાય છે. બ્રાઝિલમાં એક હરાજી દરમિયાન આ ગાય 4.8 મિલિયન યુએસ ડોલરમાં વેચાઇ છે, જે ભારતીય રૂપિયામાં 40 કરોડ રૂપિયા બરાબર છે. આ સાથે તે વિશ્વમાં સૌથી મોંઘા ભાવે વેચાયેલી ગાય બની છે. રેશમી સફેદ ફર અને ખભા પર વિશિષ્ટ બલ્બ હમ્પ ધરાવતી આ ગાય મૂળ ભારતની છે. જાણીને નવાઈ લાગશે કે આ ગાયનું નામ નેલ્લોર જિલ્લાના નામ પરથી રખાયું છે. બ્રાઝિલમાં આ જાતિની ખૂબ માંગ છે.
ગાયની આ જાતિ વૈજ્ઞાનિક ભાષામાં બોસ ઈન્ડીકસ તરીકે ઓળખાય છે. વૈજ્ઞાનિકો અનુસાર, તે ભારતના ઓન્ગોલ પશુઓની વંશજ છે, જે તેની શક્તિ માટે જાણીતી છે. ગાયની વિશેષતા એ છે કે તે પોતાની જાતને પર્યાવરણ પ્રમાણે અનુકૂળ બનાવે છે. આ પ્રજાતિને 1868માં વહાણ દ્વારા પ્રથમ વખત બ્રાઝિલ મોકલા હતી. આ પછી 1960ના દાયકામાં બીજી અનેક ગાયોને ભારતથી લઇ જવાઇ હતી.
ઓન્ગોલ જાતિના પશુઓની સૌથી મોટી વિશેષતા એ છે કે તેઓ ખૂબ જ ગરમ તાપમાનમાં પણ જીવી શકે છે કારણ કે તેમનું મેટાબોલિઝમ ઘણું સારું છે. તેને કોઈ પણ પ્રકારનો ચેપ પણ લાગતો નથી. બ્રાઝિલમાં ખૂબ જ ગરમી છે, તેથી આ ગાય ખૂબ જ પસંદ કરાય છે. આ બ્રીડને જિનેટિકલી વધુ વિકસિત કરાઇ છે. પરિણામે તેનું વાછરડું માતા કરતાં પણ વધુ ઉચ્ચ ગુણો ધરાવતું હશે તેવું વૈજ્ઞાનિઓનું માનવું છે.
