રૂ. ૩૮ કરોડના હેરોઇન સાથે બ્રિટિશ પાકિસ્તાની દંપતીની ધરપકડ

લાહોરઃ રૂ. ૩૮ કરોડના ૨૫ કિગ્રા હેરોઈનને દાણચોરી દ્વારા બહાર લઈ જવાનો પ્રયાસ કરનાર પાકિસ્તાની બ્રિટિશ દંપતીની સિયાલકોટમાં ધરપકડ કરાઈ હતી. યોર્કશાયરના ૨૬ વર્ષના મહોમ્મદ તાહિર અયાઝ અને તેની ૨૦ વર્ષના પત્ની ઇકરા હુસૈનને દુબઈ થઈ બ્રિટનમાં હેરોઈન ઘૂસાડવાના આરોપસર ફાંસીની સજા થઈ શકે છે. તેમને એરપોર્ટ સુરક્ષા દળે ચેકિંગ માટે રોક્યા હતા અને તેમના સામાનમાંથી ૨૫ કિલો હેરોઈન મળ્યું હતું.
મહિલાના કપડામાં છુપાવેલું આ હેરોઈન સ્કેન પ્રોસેસમાં દેખાયું હતું. જપ્ત કરાયેલા હેરોઈનનું મૂલ્ય આંતરરાષ્ટ્રીય બજારમાં રૂ. ૩૮ કરોડ થાય છે. તેઓ અમિરાત એરલાઈનના વિમાનમાં બેસવાની તૈયારીમાં હતા ત્યારે તેમને પકડી લેવાયા હતા અને વધુ તપાસ માટે તેમને એન્ટિ નાર્કોટિક્સ ફોર્સને સોંપી દેવાયા હતા.