લંડનઃ વિદાય લઇ રહેલા વડાપ્રધાન રિશી સુનાકે સંસદની ચૂંટણીમાં કન્ઝર્વેટિવ પાર્ટીને મળેલા પરાજયની જવાબદારી સ્વીકારતાં ટોરી નેતાપદેથી રાજીનામુ આપવાની જાહેરાત કરી હતી. તેમણે જણાવ્યું હતું કે, મારા અનુગામીની પસંદગી થતાંની સાથે જ હું આ પદ છોડી દઇશ. 10 ડાઉનિંગ સ્ટ્રીટ ખાતે દેશજોગ સંબોધન કરતાં સુનાકે જણાવ્યું હતું કે, આઇ એમ સોરી, મેં તમારા આક્રોશ અને હતાશા અનુભવ્યાં છે અને હું જવાબદારી લઉં છું. સંખ્યાબંધ મુશ્કેલ દિવસો બાદ આ પણ એક મુશ્કેલ દિવસ છે. હું હવે તમારા વડાપ્રધાન તરીકેની ફરજનો ત્યાગ કરું છું. ત્યારબાદ સુનાક બકિંગહામ પેલેસ પહોંચ્યા હતા અને કિંગ ચાર્લ્સને મળીને તેમનું રાજીનામુ સુપ્રત કર્યું હતું.
આ પહેલાં યુકેની સંસદની ચૂંટણીમાં મળેલા કારમા પરાજયની જવાબદારી સ્વીકારતાં કન્ઝર્વેટિવ પાર્ટીના વડા રિશી સુનાકે જણાવ્યું હતું કે, બ્રિટિશ જનતાએ ગંભીર ચુકાદો આપ્યો છે. તેમાંથી ધડો લઇને ઘણું શીખવાનું છે. ચૂંટણીમાં મળેલા પરાજયની જવાબદારી હું સ્વીકારું છું. સંસદની ચૂંટણીમાં લેબર પાર્ટીનો વિજય થયો છે. મેં સર કેર સ્ટાર્મરને કોલ કરીને વિજય માટે અભિનંદન પાઠવ્યાં છે. આજે તમામ દિશામાંથી શુભેચ્છા સાથે દેશમાં શાંતિપૂર્ણ રીતે સત્તા પરિવર્તન થઇ રહ્યું છે. આ એક એવી બાબત છે જેના દ્વારા આપણા દેશની સ્થિરતા અને ભવિષ્યનો આત્મવિશ્વાસ મળવો જોઇએ.
વિદાય લઇ રહેલા વડાપ્રધાન રિશી સુનાકે જણાવ્યું હતું કે, ઘણા આકરી મહેનત કરનારા કન્ઝર્વેટિવ ઉમેદવારો તેમના અથાક પ્રયાસો, સ્થાનિક સ્તરે કરેલા કામ અને સમુદાયો પ્રત્યેની તેમની પ્રતિબદ્ધતા છતાં પરાજિત થયાં છે તેનો મને ખેદ છે.
સુનાકે જણાવ્યું હતું કે, વડાપ્રધાનપદ પરથી રાજીનામુ આપ્યા બાદ હું નોર્થએલર્ટોન પરત ફરીશ.હું અહીં મારા પારિવારિક ઘરમાં પાછો આવવાનો છું. આગામી સપ્તાહો, મહિના અને વર્ષોમાં હું અહીં તમારી સાથે વધુ સમય વીતાવવાનો છું.
પોતાની રિચમન્ડ નોર્થએલર્ટોન બેઠક જાળવી રાખનાર રિશી સુનાકે જણાવ્યું હતું કે, એક દાયકા પહેલાં હું અહીં રહેવા આવ્યો ત્યારથી મને અને મારા પરિવારને તમે ખૂબ જ પ્રેમ આપ્યો છે અને હું સંસદસભ્ય તરીકે તમારી સેવા કરતો રહીશ.
અક્ષતા મૂર્તિના 395 પાઉન્ડના ડ્રેસે ચર્ચા જગાવી
લંડનઃ વિદાય લઇ રહેલા વડાપ્રધાન રિશી સુનાક 10 ડાઉનિંગ સ્ટ્રીટ ખાતે દેશજોગ ફેરવેલ સ્પીચ આપી રહ્યા હતા ત્યારે તેમના પત્ની અક્ષતા મૂર્તિએ પહેરેલો ડ્રેસ ચર્ચાનો વિષય બની રહ્યો હતો. રેડ, વ્હાઇટ અને બ્લૂ શેવરોન ગાઉન ઓમી ના ના એથિકલ ડિઝાઇનર દ્વારા તૈયાર કરાયો છે અને તેની કિંમત 395 પાઉન્ડ છે.
