લંડનઃ બકિંગહામ પેલેસ ખાતે આયોજિત સમારોહમાં મેટ્રિક્સ મેટ કોર્પોરેશન લિમિટેડને કિંગ્સ એવોર્ડ્સ ફોર એન્ટરપ્રાઇઝથી સન્માનિત કરાશે. કંપનીના સીઇઓ રામનરેશ સોની કંપની વતી આ એવોર્ડ સ્વીકારશે. કિંગ્સ એવોર્ડ્સ ફોર એન્ટરપ્રાઇઝ બ્રિટિશ બિઝનેસ માટેનો સૌથી પ્રતિષ્ઠિત એવોર્ડ ગણાય છે. આ એવોર્ડ માટેની ભલામણ વડાપ્રધાન દ્વારા કરવામાં આવે છે.
મેટ્રિક્સ મેટ કોર્પોરેશનને અસામાન્ય વૃદ્ધિ માટે કિંગ્સ એવોર્ડ ફોર ઇન્ટરનેશનલ ટ્રેડ માટે પસંદ કરાઇ છે. સીઇઓ રામનરેશ સોની બકિંગહામ પેલેસ ખાતે કિંગ ચાર્લ્સ તૃતીય દ્વારા આયોજિત સમારોહમાં આ એવોર્ડ સ્વીકારશે. મેટ્રિક્સ મેટ કોર્પોરેશન લિમિટેડ યુકેમાં સૌથી ઝડપથી વિકાસ પામી રહેલી સ્ક્રેપ મેટલ રિસાઇકલિંગ કંપની છે. આ કંપની સમગ્ર વિશ્વમાં રિસાઇકલ્ડ મેટલની નિકાસ કરે છે.
નોર્ધમ્પટનશાયરમાં પ્લાન્ટ ધરાવતી આ કંપનીના સીઇઓ સોની કહે છે કે કંપની સપ્લાયર અને ક્લાયન્ટને અસરકારક સેવા આપવા અને સ્પષ્ટ તથા પ્રમાણિક બિઝનેસના સિદ્ધાંત પર કામ કરે છે. આ સિદ્ધાંત જ અમારી સફળતાનો પાયો છે.
