લંડનઃ લંડનના મેયરપદે ઐતિહાસિક ત્રીજી ટર્મ માટે ચૂંટાઇ આવેલા સાદિક ખાને મંગળવારે શહેરના મેયર તરીકેના શપથ ગ્રહણ કર્યાં હતાં. તેમણે શપથ લીધા બાદ લંડનને વિશ્વનું શ્રેષ્ઠ શહેર બનાવવાની પ્રતિજ્ઞા લીધી હતી. સાદિક ખાન સતત ત્રીજી ટર્મ માટે જીતનારા લંડનના પ્રથમ મેયર છે.
ટેટ મોડર્નમાં આયોજિત શપથ ગ્રહણ સમારોહમાં સાદિક ખાને જણાવ્યું હતું કે, હું લંડનને તકોનું શહેર બનાવવા માગુ છું. લંડન શહેર લોકોને વૃદ્ધિ કરવા માટે વિશ્વનું શ્રેષ્ઠ શહેર બની રહેશે. તેનો અર્થ એ થયો કે યુવાઓને સપોર્ટ કરવો પડશે.
ખાને જણાવ્યું હતું કે, હું લંડન સ્ટેટની પ્રાથમિક શાળાઓમાં વિના મૂલ્યે અપાતા સ્કૂલ મીલને કાયમી બનાવવા માગુ છું. હું યૂથ ક્લબને વધુ ભંડોળ આપવા અને મેન્ટલ હેલ્થ સપોર્ટ વધારવા પણ માગુ છું. તેમણે લંડનના વિકાસ માટે વિપક્ષના નેતાઓને સહકાર આપવાની પણ અપીલ કરી હતી.
