લંડનઃ ક્રિકેટના મક્કા ગણાતા ઇંગ્લેન્ડના લોર્ડ્સ ક્રિકેટ ગ્રાઉન્ડ ખાતે વર્ષ 2026માં પહેલીવાર મહિલા ટેસ્ટનું આયોજન થશે અને આ ટેસ્ટમાં ભાગ લેવાનું સન્માન ભારતની મહિલા ક્રિકેટ ટીમને મળી રહ્યું છે. ઇંગ્લેન્ડ અને ભારતની મહિલા ટીમો વચ્ચે આ ટેસ્ટ મેચ યોજાશે.
ઇંગ્લેન્ડ એન્ડ વેલ્સ ક્રિકેટ બોર્ડે આ અંગેની જાહેરાત કરતાં સીઇઓ રિચર્ડ ગૌલ્ડે જણાવ્યું હતું કે, જુલાઇ 2025માં ભારત અને ઇંગ્લેન્ડની મહિલા ટીમો વચ્ચે 3 વન ડેની શ્રેણી પણ રમાશે. 2026માં ટેસ્ટ મેચ રમવા ભારતીય ટીમ ફરી ઇંગ્લેન્ડના પ્રવાસે આવશે. આ એક વિશેષ પ્રસંગ હશે.
લોર્ડ્સના ગ્રાઉન્ડ પર યોજાનારી આ પ્રથમ મહિલા ક્રિકેટ ટેસ્ટ મેચ હશે. ઇંગ્લેન્ડની ટીમ સામે ભારતની મહિલા ટીમ જૂન 1986થી અત્યાર સુધીમાં 9 ટેસ્ટમેચ રમી ચૂકી છે.
