ભારતીય ઉપગ્રહ જીસેટ-18ને લઈ જનારા યુરોપિયન એરિયન-ફાઈવ રોકેટનું છઠ્ઠી ઓક્ટોબરે ફ્રેન્ચ ગયાનાથી સફળતાપૂર્વક પ્રક્ષેપણ કરવામાં આવ્યું છે. આ પહેલાં ખરાબ હવામાનને કારણે યુરોપિયન એરિયન-ફાઈવ રોકેટનું પ્રક્ષેપણ પાંચમીએ ચોવીસ કલાક માટે પાછું ઠેલવામાં આવ્યું હતું. છઠ્ઠીએ હવામાન અનુકૂળ હોવાથી ભારતીય સમય પ્રમાણે સવારે બે વાગ્યે યુરોપિયન એરિયન-ફાઈવ રોકેટને પ્રક્ષેપિત કરવામાં આવ્યું હતું. તેના દ્વારા લોન્ચ કરવામાં આવેલો ઉપગ્રહ જીસેટ-18 એક ટેલિકોમ્યુનિકેશન સેટેલાઈટ છે અને તેનું નિર્માણ ઈસરો દ્વારા કરવામાં આવ્યું છે.
હાલ ઈસરોના ૧૪ જેટલા દૂરસંચાર ઉપગ્રહો કાર્યરત છે. ઈસરોના જણાવ્યા પ્રમાણે ૪૮ ટ્રાન્સપોન્ડરની સાથે જીસેટ-18 દેશનો એક નવીનતમ દૂરસંચાર ઉપગ્રહ છે. જીસેટ-18 સંચાર સંકેતો પ્રાપ્ત કરવા અને તેને સંચારિત કરવાની ક્ષમતા ધરાવે છે.
આ ઉપગ્રહનું વજન ૩૪૦૪ કિલોગ્રામ છે. તે કક્ષામાં સ્થાપિત થયા બાદ પંદર વર્ષ સુધી કાર્યરત રહેશે. એરિયનસ્પેસ માટે આ વર્ષનું આઠમું લોન્ચ મિશન છે. ભારતીય સંચાર ઉપગ્રહ સિવાય એરિયન-ફાઈવ રોકેટ ઓસ્ટ્રેલિયન સ્કાઈ મસ્ટર દ્વિતીય ઉપગ્રહને પણ પોતાની સાથે અવકાશમાં લઈ ગયું છે. એરિયનસ્પેસ પ્રમાણે તેમણે જીસેટ-18 સહિત ઈસરોનો વીસમો ઉપગ્રહ પ્રક્ષેપિત કર્યો છે. જીસેટના સફળ લોન્ચિંગ બદલ પીએમ નરેન્દ્ર મોદીએ ઇસરોને ટ્વિટર પર અભિનંદન પાઠવ્યાં હતાં.
