પૂ. મહંત સ્વામીની નિશ્રામાં પ્રબોધિની એકાદશી નિમિત્તે અન્નકૂટ યોજાયો

BAPS શ્રી સ્વામિનારાયણ સંસ્થાના વડા પૂ. મહંત સ્વામી હાલ નેનપુર ખાતે બિરાજમાન છે. ૨૬ નવેમ્બરને ગુરુવારે પૂ. મહંત સ્વામીની નિશ્રામાં પ્રબોધિની એકાદશીની ઉજવણી થઈ હતી. આ નિમિત્તે ભગવાનને ફળો અને શાકભાજીનો અન્નકૂટ એટલે કે હાટડીના દર્શન યોજાયા હતા. તેમાં વિવિધ પ્રકારના ફળો અને પરવળ, બ્રોકોલી,કારેલા, દૂધી સહિતના શાકભાજીને શણગારીને મૂકવામાં આવ્યા હતા. પૂ. મહંત સ્વામીએ અન્નકૂટ આરતી એટલે કે હાટડી આરતી કરી હતી. પૂ. મહંત સ્વામીએ ચાણસદમાં તૈયાર થનારા શ્રી રામ મંદિર માટેની ઈષ્ટશિલાનું પણ પૂજન કર્યું હતું. તેઓ દરરોજ વીડિયો કોન્ફરન્સના માધ્યમથી સાધુ - સંતો સાથે સત્સંગ કરે છે.

દેશ-વિદેશમાં રહેતા હરિભક્તો પૂ. મહંત સ્વામીની પ્રાતઃપૂજાના દર્શનનો વેબકાસ્ટીંગના માધ્યમથી લાભ લઈ રહ્યા છે. પૂ. મહંત સ્વામી નેનપૂરમાં રહીને દેશવિદેશમાં યોજાતા સત્સંગના વિવિધ કાર્યક્રમોમાં હાજરી આપે છે. હરિભક્તો દર રવિવારે સાંજે ૫.૩૦થી ૭ દરમિયાન યોજાતી સત્સંગ સભામાં આશીર્વચનો, વિવિધ સંતોના વ્યાખ્યાનો તેમજ કિર્તનોનો લાભ પ્રાપ્ત કરી રહ્યા છે. sabha.baps.org અને live.baps.org પરથી સમયાંતરે કાર્યક્રમો પ્રસારિત થાય છે.